Eko izaki magikoa da, eta musikaren eta kantuaren bidez aurre egingo die itsasoari eragiten dioten arriskuei. Publikoarekin eta gure musikariekin batera, kutsaduraren, itsas ekosistema betetzen duten plastikoen eta aldaketa klimatikoaren aurka borrokatzen ikasiko du, arazoak eta horiek izan ditzaketen konponbideak azalduz. Umorean murgildurik, kantua, gorputz-perkusioa eta talde-lanaz baliatuz, itsasoari laguntzen eta naturarekin harmonian bizitzen ikasiko dugu.
Soinuak Haizean taldearen ikuskizun berria 2025ean estreinatu da, eta antzerkia eta musika klasikoa uztartzen dituen umorezko obra da. Mozart, Grieg, Schubert edo Glinkaren melodiez baliatuz eta ikusleen parte-hartzearekin gorputzeko perkusio eta kantu elementuekin, naturarekiko errespetuaren garrantziaz hitz egingo digu.